Knowledge Circles

ဒီနေ့လို အေအိုင်ခေတ်မှာ အချက်အလက်တစ်ခုခု သိချင်တာ အလွယ်တကူ ရှာလို့ရပေမယ့် ဆက်စပ်တွေးခေါ်တဲ့ အလေ့အထ၊ နှိုင်းယှဉ်စဉ်းစား သုံးသပ်တဲ့ အလေ့အထ... ဒီလိုနေရာမှာတော့ အေအိုင်က အခုထိ လူကို မမီသေးပါဘူး။ အေအိုင်က အချက်အလက်တွေ အများကြီးကို အချိန်တိုတိုအတွင်း ရှာပေး၊ ထုတ်ပေးတဲ့ နေရာမှာ ခိုင်းလို့ကောင်းပေမယ့် ခိုင်းတဲ့ လူသားပေါ် မူတည်ပြီး ပေးလာတဲ့ အချက်အလက်တွေကလည်း အတော်ကို ကွာပါတယ်။

အေအိုင်က အပေါ်ယံလောက်ပဲ ပေးတာများပြီး၊ မေးတဲ့သူက ချင့်ချိန်စဉ်းစားပြီး အသေးစိတ် မေးခွန်းထုတ်နိုင်မှသာ သိပ်မဆိုးတဲ့ ရလဒ် ရနိုင်တာပါ။ သူနဲ့မတူတာက စူးစမ်းတာ၊ နှိုင်းယှဉ်တာ၊ စဉ်းစားချင့်ချိန် သုံးသပ်တာကိုတော့ ကျွန်မတို့ လူသားတွေက "အူဝဲ" လို့ အော်ပြီး လူ့ဘဝထဲ စရောက်ကတည်းက လုပ်လာကြတာပါ။

ကျွန်မတို့ ဘဝသက်တမ်းတစ်လျှောက် ကြုံလာရတဲ့ အတွေ့အကြုံတွေ၊ ခံစားခဲ့ကြရတဲ့ ပျော်ရွှင်မှု၊ နာကျင်မှုတွေ၊ ချစ်ခြင်းမုန်းခြင်းတွေ၊ အမှားတွေအပြင် လဲကျခဲ့တဲ့အချိန်တွေက ပြန်ရုန်းထခဲ့ကြတဲ့ အတွေ့အကြုံတွေ... ဒါတွေအားလုံးကို အေအိုင်ဟာ ကျွန်မတို့ လူသားတွေလို ဘယ်တော့မှ မရနိုင်ပါဘူး။

ဒါကြောင့်ပဲ ကိုယ်က အေအိုင်ခေတ်မှာ ပြည့်စုံစွာ ဖော်ပြရေးသား ပြင်ဆင်ထားတာထက်၊ လူတွေရဲ့ အတွေးအမြင်နဲ့ ရေးသားထားတဲ့၊ တသားတည်း ဖြစ်မနေတဲ့ အပိုင်းအစလေးတွေကလာတဲ့ စစ်မှန်မှုရဲ့ အနှစ်သာရကို ပိုပိုပြီး နှစ်ခြိုက်လာပါတယ်။ စကားကြီး စကားကျယ် ဆိုရရင်တော့ ကွဲပြားစုံလင်ပြီး မညီမျှမှုတွေနဲ့ ပုံဖော်ထုဆစ်ထားတဲ့ မပြည့်စုံခြင်းရဲ့ အလှတရားကို ပိုလို့ တောင့်တလာမိတော့တာပါပဲ။

ဒါကြောင့်လေ ဒီခေတ်လူငယ်တွေကို မှာချင်တာကတော့... အချက်အလက်အမှန်နဲ့ အပေါ်ယံ လှပမှုတွေထက် ရဲရဲကြီးတွေးပြီး ရဲရဲကြီးမှားကြရင်းကနေ ရလာမယ့်၊ ကိုယ်တွေ့ခံစားရင်း သိလာမယ့် အတွေ့အကြုံကနေရတဲ့ "ခံစားသိ" အတတ်တွေကို ယူကြပါလို့ မှာရင်း........တော်သေးပြီ။    ။